Ika’y Isang Tula

Ika’y isang tula.
Dulo mo ma’y di “tugma”
At “sukat” mo’y ‘di nakapagdadala
ng pambihirang saliw,
‘Di pagsasawaang basahin
Nang mapakinggan ang himig
mong nalilikha.

Ika’y isang tula.
Taglay mo’y ‘di mabilang
na “saknong”
At magkakaibang “taludtod”
na may iba’t ibang kahuluga’t
kaisipan, ngunit
‘Di pagsasawaang tuklasi’t
galugarin nang ika’y buong
pusong maunawaan.

Ika’y isang tula.
At ikaw mismo ang “paksa”.
Misteryong ‘yong taglay sa bawat
linyang aking nababasa’y ‘di
pagsasawaang paglaan
ng oras at panahon
upang mapagnilayan
ng isip, puso’t kaluluwa.

Ika’y isang tula
Na ‘di ko pagsasawaang
basahin, unawain, at
mahalin.